双向奔赴的才叫爱情,你呢啲叫求包养

双向奔赴的才叫爱情 你好啊，我叫小菊，我系一个35岁嘅单亲妈咪，我已经离异咗。 虽然我已经30几岁，但系我身边一直都唔缺桃花或者讲唔缺烂桃花吧，我虽然离过婚啦，但系我对婚姻依然都仲系好向往，或者你觉得我好傻，但系我觉得女人最终嘅归宿都喺婚姻同埋家庭上面，所以我一路都冇放弃去追求我嘅爱情，或者我嘅婚姻。 我最近遇到件事其实都几令我觉得难堪，我而家有两个比较好嘅人选，其他嗰啲玩玩下，我就唔统计喺入黎啦，如果全部要计嘅话，十个八个都不在话下，两个人条件各又好坏，令到我无法取舍。 阿a系做老师，喺大学度教书，佢亦都系一个离异嘅爸爸，佢比我大差唔多十年，已经45，阿B系一个程序员，比我细几岁，未结过婚，个人都好单纯，对我都好好，好着紧我。我哋曾经短暂咁样拍过一次拖，但系后嚟大家就不了了之。 阿a可以讲系一个比较合适结婚嘅人，因为佢结过婚同埋年纪比我大，思想都好成熟，虽然佢对我冇B咁热情，但系应该做嘅嘢佢都做晒，我哋亦都发生咗关系，但系佢始终冇俾一个明确嘅名分我，我亦都冇去追佢要佢俾一个名分我，我哋基本上星期六日都会搵时间见面，一齐食饭行街睇戏。 其实有时候我都唔知佢系玩玩下定系真系有心同我过日子嘅，因为佢条件比较好，如果嫁俾佢，我谂我未来嘅生活就唔使忧噶啦。 而阿B佢各方面条件都几好，就系太矮啦，一个男人先得个一米六，而且有少少斗鸡眼。 不过胜在佢做it都叫搵到钱，每个月都有2万几嘅收入，佢而家仲系冇房冇车，乜嘢都冇，但系佢话，如果我想要佢都可以买，佢仲同我讲佢而家份工都几有前途，好有竞争力，佢同我讲咗好多关于我哋嘅未来，我都感觉到佢对我系好用心，好在乎我。 我亦都同佢讲咗，我冇咁快可以答到佢，我仲喺度考虑，我甚至将啊a嘅情况都话佢知，甚至CDEF其他嗰啲佢都会知，我系一个好坦诚嘅人，我唔中意收收埋埋，喺我未确定之前我会将我所有嘅情况全部话晒佢知，如果佢可以接受，咁我哋就继续，如果佢接受唔到咁我哋就算数。 我同阿a就唔会讲得咁多，我可能会讲啲唔讲啲，毕竟以佢嘅身份可能佢冇咁容易接受到我而家呢啲感情嘅杂事，其实讲真，我同阿a冇乜话题噶咋，阿B反而会好少少，但系亦都好唔到去边度，其实到咗我个年纪，我唔一定话要搵一个好有话题喺埋一齐好开心嘅人，我只需要搵一个可以锡我，可以俾到物质需求，可以令到我未来嘅生活有保障嘅人，我觉得已经够啦。 其实我条件都唔算好噶，我先一米五几，我个女系跟住我前夫嘅，但系我前夫系一个好唔争气嘅人，好多时候我都要去照顾我个女，就算佢读书或者生病我都要俾钱，可能喺好多男人眼中个系一个拖油瓶，佢虽然唔系跟我，但我依然都系佢阿妈，所以我唔可以因为有个新嘅家庭或者有新嘅关系，我就唔去理个女，我真系做唔到。 我身边有咁多桃花，可能有一部分都因为系我生得还可以，所以佢哋好似表面上都唔介意我嘅过去，或者我咁复杂嘅感情，其实我系一个好缺乏安全感嘅人嚟嘅，我亦都好自卑，我知道我想要啲乜嘢，但系我唔知我配唔配拥有。 我第一段婚姻可以话算系我初恋，其实我以前生得并唔靓噶，我同我前夫一齐嘅时候我都仲系一个好普通嘅人，后尾我出嚟做嘢赚到啲钱，我有做过微调，我嘅五官喺有整过嘅，但喺唔多，有阵时有一个漂亮嘅外壳，真系可以做到好多嘢。 而家追紧我嘅男仔，我都会同佢哋讲我嘅身世，包括我有整过呢件事情。 我而家觉得最烦嘅一件事情就系阿B，而家开始逼我去做选择，佢要我删晒所有其他男人嘅联系方式，包括微信电话，佢对我好似有一种好强嘅控制欲，但系佢话因为佢太紧张我，太在乎我，佢唔想我同其他男人有过多嘅联系，但系我喺广州其实都冇咩朋友，同我倾得好好嘅异性，其实我都系当朋友，我都好想有自己嘅圈子，有自己嘅生活，但系我亦都知道佢缺乏安全感，我都可以 理解。 佢前日上嚟我度，我问佢想做乜嘢，佢话想同我倾清楚，佢话觉得好攰好难受，我话你想倾乜嘢，我话我冇办法咁快俾到答案你，我知佢对我好，但系我而家真系好难去决定。其实讲真，我真系好介意佢咁矮嘅，如果我哋喺埋一齐之后再生个细路仔，我又矮佢又矮，细路仔一定会矮嘅，再加上佢做it，都已经差唔多30啦，过咗35，如果佢冇升嘅话，可能职业上面都会有啲好大嘅风险，其实我系想结婚之后可以安心咁样做个全职太太。 阿B就算佢几爱我都好，佢俾唔到份安全感我，就算佢几咁用力佢都比唔上阿a咁优秀，但系阿a始终经历过婚姻，可能佢对爱情或者婚姻唔会咁盲目。 所以我就喺度等等阿a去开声，只要佢肯开声，其实我唔介意佢爱唔爱我，我只想有一个港湾可以令我有安全感。 最近阿B都已经有啲失控，成日冲上嚟我住嘅地方，一路咁样缠住我，唔俾我同其他人倾偈，仲要查我手机，睇我通话记录，我觉得件事情我可以理解，但系我哋而家未正式确定关系嘅时候，佢去做呢件事情，我都好反感，我同佢讲，我话我冇可能俾你睇嘅，我亦都冇可能删晒我所有嘅联系方式，如果喺埋一齐之后佢咁样要求我，要查我通话记录，查我聊天记录，我可以俾佢睇，但系而家未到时候。我其实都好乱，我都唔知我想要啲咩生活嘅，而家阿B逼得我太紧啦，我真系好烦，我唔知点算好，我惊错过咗之后，以后再唔搵到对我咁好嘅人。 我已经35岁，其实我真系冇几年可以等噶咋，两个人真系唔知拣边个，你可唔可以俾个意见我，多谢。 回复： 其实讲真，我觉得你个故事都冇咩太过复杂嘅嘢，就系阿a系大学老师，有钱稳定，可以俾到你下半生嘅安稳，阿B好爱你，但系身体条件麻麻哋，同埋佢份工又比唔上阿a咁优秀，但系起码佢目前嘅收入你系觉得OK嘅，佢亦都对你好有热情，好在乎你，问题系佢控制力太强逼得你太紧。 你两个都有意向，但系你更加倾向于a，而阿a好似并冇咁有热情去同你定立婚约，所以好惊错过几年。两个男人你一个都得唔到，你仲有其他cdef，你有一大堆人，但系嗰啲人可能听到你嘅故事，听到你嘅背景，佢哋都唔敢对你认真，我唔知你系太直白，定系你完全冇谂过后果，有阵时有啲嘢系唔适合全部攞出嚟讲嘅，你可以去考察一个人，你可以去坦诚，但要睇时机同埋场合，以及睇人睇身份。 如果我系一个追求者，我去追求一个女仔，佢同我讲，仲有ABCDE喺度追紧佢，佢哋嘅条件系点样，对佢系点样，我听到之后我系咩感觉，我好肯定同你讲，从嗰一刻开始，我就唔会当佢系我唯一去追求嘅对象，佢都只系我嘅备选项。 正所谓宁俾人知，莫俾人见，你咁坦诚，你想做乜嘢？ 你系想佢哋知道你有好多人追，所以对你更紧张，定系想令佢哋知道你嘅人系冇边界，好中意去招惹啲狂蜂浪蝶，我真系唔知你嘅动机系乜嘢。 同埋佢咁样都系因为你啫，如果你唔成日同佢讲有阿a有阿C有阿D有阿ef喺度，佢会唔会咁样对你咩，我又觉得未必喎，一切都系你咎由自取嘅，至于你话点拣，我真系帮唔到你，你自己谂清楚自己想要啲咩先啦，正如你讲你自己都唔知自己想要啲咩，作为旁观者嘅我，我可以帮到你啲咩咧，系咁，祝你幸福。